Omivo 100 dhiilonga yEvaangeli mOmbalantu

Embo ndika, Omivo 100 dhiilonga yEvaangeli mOmbalantu otali gandja ehistoli lyomuule lyiilonga yetumo mOmbalantu, osho wo etaandelitho lyElaka etoye okuza megongalo Nakayale okuza sho lya totwa 1917 sigo 2017. Embo olya ndjandjukununa nawa uuyamba wopauthiga wehistoli lyAambalantu manga uukriste inaawu thika moshilongo. Embo olya hokolola wo osheetwapo shotango shaatumwa Aasuomi mependulopo lyOmbalantu kombinga yuundjolowele, elongo nokuulika epondolo nomashongo miilonga yetumo lyaSuomi mOmbalantu.

Embo olya pakela uuyamba wopahistoli mboka kaawu na mpoka wa nyolwa mOshiwambo.
-Dr Petrus Mbenzi, Senior Lecturer: Oshiwambo, University of Namibia

Eingwandjulomumwe lyetumo lyEvaangeli moshigwana shaMbalantu nomuthigululwaputuko gwasho inayi tongomonwa mo nawa ngaashi sha li shi na okukala. Embo ndika olyo eminikilo lyiiningwanima yoshili yopandjokonona naanaa ngaashi ya ningwa kaatumwa ya tetekela nokAambalantu yongashingeyi okutunga nokutsikila oshilonga shEvaangeli mOmbalantu.
-Omumbisofi Lukas Katenda, Reformed Evangelical Anglican Church of Namibia (REACH-Namibia)

Sebulon Ekandjo okwa valelwa mOkahao mOngandjera. Sho a mana osikola yaamati mOngwediva, okwa ka longa kOmina yaBrandberg. Okwa tsikile osikola yOshiputudhilo shuulongi. Ongeleki ye yaELCIN, oye mu tumu a ka longe osikola yaanona koNakayale okuza 1960 sigo 1962. Ongeleki ye oye mu ithana ko a ka tameke Oseminali yuusitagongalo koPaulinum, kOtjimbingwe hoka a kala omivo 1963-1965. Okwa tumwa kOngeleki a ka longe kegongalo lyaTshandi kUukwaluudhi (1966-1968). Opo Ongeleki oye mu ithana ko ishewe a ye kOniipa oku ka nyola oshifo shOngeleki, Omukwetu (1969-1976).

Okwa langekwa omusita megongalo Onipa okuza 1977 sigo 1981. Okwa shuna ishewe koshilonga shokunyola Omukwetu omivo 1982-1999, sho a yi moshipundi shevululuko. Okwa hokana noku na aanona yahamano. Ekandjo omunyoli gwomambo gomadhina ngaka; Omimvo 130 dhiilonga yEvaangeli mOniipa, 1872-2002 (inali nyanyangidhwa), Okahao momimvo 135 (1871-2006). Gondjokonona nogopaitaalo ogo; Ongeleki pethimbo lyuulunde wa putuka, LyAngula nomagano geyaludho mu ELCIN, Tate edhina lyandje otali ti ngiini?